الانترنت ترف ما تحتاجه

لا زلت اتذكر اول يوم دخلت فيه للإنترنت من منزل ابن عمي وكان الاتصال من خلال البحرين، وكيف كنت مبهور بهذه الشيء العجيب.

ولا زلت اتذكر اول يوم اشتريت فيه جهاز موديم و ركبنا الانترنت في البيت والمعاناة لما احد يرفع سماعة التلفون ويقطع الاتصال وانا بنزل برنامج او تحديث.

واضحك على اللحظة اللي جبنا فيها رقمين تلفون واحد ليا وواحد لاخويا وجبنا العيد في الفاتورة 😂.

او اللحظة اللي اتعلمت فيها شيء اسمه شبكة وممكن انا وأخويا ندخل من نفس الاتصال ونوفر فلوس الاشتراك وفلوس الاتصال وكيف نتفق مع بعض متى ندخل.

وأخيراً لما وصل الدي اس ال وكنا اول بيت يركبه في الحي وصرت اساعد واعلم الجيران كيف يجيبوه وكيف يعملوا شبكة داخل البيت.

الانترنت من اليوم الاول اتعلمت من خلاله اشياء كثيرة والفضل بعد الله للإنترنت في معظم ما تعلمت.

في اول يوم دخلت الانترنت كنت ابغى أتعلم كيف اسوي موقع وفعلاً اتعلمت، وبعدها صرت ابغى يكون عندي موقع بالدومين الخاص بي و كان شيء صعب خاصة لواحد في الثانوية وفِي فترة ما كانت البطائق الائتمانية منتشرة ومع ذلك واجهت كل شيء و اقتنيت دومين.

بعدها فكرت ليش ما يكون عندي ايميل على الدومين ولازم اسوي الشيء هذا وسويته، ورحلة رائعة مريت بيها، اتعلمت الكثير من خلالها و لازلت أتعلم منها، حتى وصلت للي وصلت له اليوم.

الرحلة هذه يعتقد الكثير انها سهلة وخاصة ان الانترنت صاير كأنه شيء سهل، لكن الرحلة هذه كلفتني كثير، وانا اشكر الله ان والدي كان عون كبير فيها.

اول ما قلت له عن الدي اس ال قلي يلا نركب وفعلاً كانت لحظات رائعة مع السرعة والراحة وفجأة صار ضغط على الكبينة وكان في عرض رهيب من اوربت على الانترنت عن طريق الأقمار الصناعية، كلمت والدي و قلي يلا أتوكل على الله، و جبنا انترنت اوربت وارتحنا فترة طويلة لين فجأة ظهر لنا غول الاستخدام العادل وصارت الحياة لا تحتمل، الدي اس ال اتحسن فحولنا مرة ثانية عليه، و صار كل فترة فيه تحديثات للسرعة ونحن نتطور معاها، حتى جا اليوم المشئوم قبل ٦ سنوات وخربت الكبينة والاتصالات السعودية قررت انها ماراح تصلحها لان في شيء رهيب اسمه الفايبر وراح يتركب في الحي، وفعلاً وقتها ممتاز طالما فايبر خلاص انتهت المعاناة، و فترة مؤقتة ممكن نستخدم الانترنت عن طريق الجوال، واشتركت انترنت جوال، و فجاة موبايلي توصل الفايبر لنص الحي واستبشرت خير وفجأة موبايلي تمر بنكبة وتوقف المشروع وتتغير رؤية الشركة، و فجاة الاتصالات السعودية تغطي معظم الحي وتوقف لان في تنظيمات جديدة وتقسيمات جديدة ومشاكل مع البلدية.

خلال هذه الفترة ونحن في البيت نتنقل بين شركة للثلنية وباقات البيانات لين صار عندنا في البيت ٦ رواترات بيانات، وكل يوم والثاني تغيير في الباقات و السياسات.

خلال ستة سنوات انا انتظر الدي اس ال يتصلح او الفايبر يوصل، خلال ستة سنوات وانا أعيش في معاناة حقيقية.

اشتركت في راقي موبايلي وكنت مبسوط ولكن فجاة شبكتهم ما تتحمل.

اشتركت في جو ولكن مافي تطور في البداية كانت ممتازة وسائر.

اشتركت في زين و فجاة يصير ضغط على الشبكة وتوقفت.

صرت أتنقل بين الشركات كل شهر شركة وفِي بعض الفترات يكون عندي اشتراكين في نفس الوقت عشان يكون عندي انترنت.

انتقلت للاتصالات السعودية و طلع باقة ٨٠٠ وبدون استخدام عادل واشتركت بها، وارتحت كم شهر، وفجأة يعلنوا عن باقة ٨٠٠ جديدة شفتها وما حولت عليها لان فيها فخ الاستخدام العادل، واتفاجيء ان باقتي القديمة وبدون مقدمات صارت باستخدام عادل.

الانترنت بالنسبة لي ليس مجرد ترفيه او ترف

زوجتي تدرس عن بعد و تحتاج الانترنت

انا شركتي قائمة على الانترنت ولكن على ما يبدو ان الصورة الذهنية الموجودة عند الكبار في السن ان الانترنت ترفيه وترف هي نفس الصورة الموجودة عند شركات الاتصالات.

الانترنت اصبح حاجة زي الكهرباء والماء في المنزل